Updated on: June 6, 2022, 5:04 p.m.
Published on: April 6, 2016, 4:01 a.m.
លោក លុន វុទ្ធី មានដើមកំណើតក្នុងខេត្តកំពត បានចាប់ផ្តើមអាជីពរបស់ខ្លួននៅក្នុងទីក្រុងភ្នំពេញ ដោយធ្វើការជាមួយក្រុមហ៊ុនវៀតណាមនាំចូលទូកុងតឺន័រសម្រាប់ដាក់អីវ៉ាន់ចូលមកក្នុងប្រទេសកម្ពុជា ក្នុងបំណងដើម្បីកែច្នៃវាឲ្យទៅជាលំនៅឋានវិញម្តង។
ខណៈដែលម្ចាស់ក្រុមហ៊ុនដែលលោកធ្វើការជាមួយដំបូងផ្តោតលើការលក់ទូកុងតឺន័រសម្រាប់ដឹកជញ្ជូនរបស់របរផ្សេងៗនោះ លោក វុទ្ធី បានចំណាយពេលវេលាពីរបីឆ្នាំដំបូងរបស់លោកធ្វើការស្រាវជ្រាវតាមរយៈទូរស័ព្ទដៃលើគម្រោងកែច្នៃការប្រើកុងតឺន័រប្រកបដោយប្រសិទ្ធភាពនៅជុំវិញពិភពលោក។
នៅពេលដែលលោកឆែកមើលអគារខុនដូ ហាងកាហ្វេ ការិយាល័យសម្រាប់ជួល និងស្ទូឌីយោថតសំឡេងក្នុងតំបន់ធំៗនៅជុំវិញពិភពលោក លោក វុទ្ធី បានឃើញនូវឱកាសដ៏ពិសេសមួយដែលលោកអាចយកទូរកុងតឺន័រដែកទាំងអស់នេះមកច្នៃប្រឌិតក្នុងមុខជំនួញរបស់លោក។
លោកបានថ្លែងថា ៖ «ទូកុងតឺន័រមួយៗវាដូចជាផ្ទាំងសំពត់ដែលផ្នែកខាងក្នុងទទេស្អាត។ វាដូចជាសម្បកអគារអីចឹងដែរ ប៉ុន្តែយើងអាចតុបតែង និងកែច្នៃទាំងផ្នែកខាងក្នុង និងខាងក្រៅបានបានយ៉ាង ច្រើនបែបផែនរាប់មិនអស់»។
កាលពី៣ឆ្នាំមុន ម្ចាស់ក្រុមហ៊ុនជនជាតិវៀតណាមរបស់លោក វុទ្ធី បានបិទហាងរបស់ខ្លួនក្នុងទីក្រុងភ្នំពេញ ហើយបានដកខ្លួនពីទីផ្សារកម្ពុជា ដែលបានហុចឱកាសឲ្យលោក វុទ្ធី អាចចាប់ផ្តើមមុខជំនួញនេះដោយខ្លួនឯងបានដែលលោកបានដាក់ឈ្មោះអាជីវកម្មរបស់ខ្លួនថា Vuthy Container។
ក្រុមហ៊ុនរបស់លោកបានដំណើរការចាប់ពីនោះមក ហើយនាពេលបច្ចុប្បន្ន សហគ្រិនវ័យ ២៨ឆ្នាំរូបនេះ មានសមាជិក ១៥នាក់ ខណៈដែលក្រុមហ៊ុនរបស់លោកកំពុងតែត្រូវបានពង្រីកសេវាកម្មរបស់ខ្លួន ដើម្បីរួមបញ្ចូលនូវការច្នៃប្រឌិតលើគម្រោងអចលនទ្រព្យដែលចង់យកទូកុងតឺន័រទៅសាងសង់។
ក្រុមហ៊ុនរបស់លោក វុទ្ធី មានការ កុម្ម៉ង់ទិញទូកុងតឺន័រពីប្រទេសចិន វៀតណាម ឬកូរ៉េ ក្នុងតម្លៃប្រហែលជា ១០០០ ដុល្លារ ក្នុង ១ កុងតឺន័រ បន្ទាប់មកយកទៅច្នៃសាងសង់ជាសំណង់លំនៅឋាន ឬសំណង់ពាណិជ្ជកម្មផ្សេងៗ។
បន្ទប់ការិយាល័យដ៏ស័ក្តិសមបំផុតដោយមានក្រាលកម្រាលព្រំផ្ទាំងកៅស៊ូការពារ និងម៉ាស៊ីនត្រជាក់ផងដែរ ត្រូវបានលក់ក្នុងតម្លៃ ៣ ០០០ ដុល្លារសម្រាប់មួយទូដែលមានទំហំផ្ទៃក្រឡាប្រមាណ ៨ម៉ែត្រការ៉េ។
ក្រុមហ៊ុនរបស់លោកធ្លាប់បានសាងសង់សម្រាប់គម្រោងក្រុមហ៊ុនកសិករ ម្ចាស់រោងចក្រ និងអ្នកដែលត្រូវការបន្ទប់ការិយាល័យតូចៗ ដោយជោគជ័យរួចមកហើយ។
ស្ថានីយទូរទស្សន៍មួយចំនួនក៏បានចុះកិច្ចសន្យាទិញកុងតឺន័ររបស់លោក វុទ្ធី ធ្វើជាបន្ទប់ស្ទូឌីយោថតសំឡេងបិទជិតបានផងដែរ។
គម្រោងដ៏ធំ និងពិសេសមួយរបស់លោកនៅពេលបច្ចុប្បន្ននេះ គឺបារ៍ K-Race ជាទូកុងតឺន័រដែលមានទីតាំងនៅផ្លូវលេខ៥៩ ខណ្ឌដូនពេញ។ K-Race គឺជាបារ៍ផង ជាភោជនីយដ្ឋានផង និងជាកន្លែងប្រគំតន្ត្រីផ្ទាល់ ដោយត្រូវបានសាងសង់ឡើងដោយទូកុងតឺន័រចំនួន២០ភ្ជាប់គ្នា។
សម្រាប់គម្រោងនេះ លោក វុទ្ធី បានចាប់ដៃគូសហការយ៉ាងយកចិត្តទុកដាក់ជាមួយស្ថាបត្យករមួយរូប ដើម្បីបង្កើតនូវសំណង់មួយដែលប្លែកទាក់ភ្នែក តែក៏អាចប្រើការបានយ៉ាងល្អផងដែរ។
បារ៍ K-Race ដែលជាមុខជំនួញមួយកំពុងតែដំណើរការយ៉ាងរលូននេះ មានអគារជាលក្ខណៈមុខជំនួញធំ ដែលមានបុគ្គលិកបម្រើការពាក់មួកមួយរឹង។ ផ្នែកខាងក្នុងរបស់ K-Race ត្រូវបានតុបតែងដោយរបស់របរចាស់ៗយកមកច្នៃជាថ្មីដូចជាបង្អួចធ្វើពីដប និងកន្លែងអង្គុយធ្វើពីពពួកធុងសាំងធំៗចំណុះ៤០ហ្គាឡុន(Gallon)ផងដែរ។
គម្រោងរបស់លោកវុទ្ធីដែលនឹងចាប់ផ្តើមឆាប់ៗខាងមុខនេះ គឺក្រុមហ៊ុន Vuthy Container នឹងចាប់ដៃគូយ៉ាងជិតស្និទិជាមួយគូស្វាមីភរិយាជនជាតិអាល្លឺម៉ង់ និងម៉ាឡេស៊ី ដើម្បីសាងសង់ជាសណ្ឋាគារបៀបបង់ហ្គាឡូ នៅក្នុងខេត្តកំពត ដែលនឹងមានការតុបតែងដោយប្រើរបស់របរចាស់ៗមកកែច្នៃជាថ្មីផងដែរ។
អ្នកលក់ភេសជ្ជៈ និងអាហារជនជាតិសិង្ហបុរីម្នាក់នៅក្នុងទីក្រុងភ្នំពេញ ក៏កំពុងតែធ្វើការជាមួយលោក វុទ្ធី ដើម្បីបើកហាងកាហ្វេមួយដែលមានទូកុងតឺន័រចំនួន៦ទូ។
ទន្ទឹមនឹងនេះដែរ លោក វុទ្ធី បានឃើញនូវការរីកលូតលាស់មុខជំនួញរបស់លោក ដែលអាចអនុញ្ញាតឲ្យលោកប្រឡូកចូលក្នុងទីផ្សារសំណង់លំនៅឋាននៅក្នុងប្រទេសកម្ពុជាថែមទៀតផង។
ជាមួយនឹងតម្លៃទាបជាង៦ពាន់ដុល្លារក្នុងមួយទូដែលមានទំហំប្រមាណ៩ម៉ែត្រការ៉េនេះ គេអាចយកទៅច្នៃធ្វើជាបន្ទប់គេង ដែលមានគ្រែ៣ មានបន្ទប់ទឹក បន្ទប់គេង កន្លែងទទួលភ្ញៀវ ឬចង្ក្រានបាយថែមទៀតផង។ ភាពងាយស្រួលក្នុងការប្រើទូកុងតឺន័រយកទៅសាងសង់ជាសំណង់លំនៅឋានបែបអាផាតមិននេះក៏ផ្តល់អំណោយផលដល់គម្រោងធ្វើលំនៅឋានដែលពុំមានដីធំគ្រប់គ្រាន់ ហើយក៏មានតម្លៃសមរម្យទៀតផង។
ដោយមានការតុបតែងបន្ថែមដោយប្រើវត្ថុធាតុដើមដូចជាស្នោរ(Styrofoam) និងសំឡីឡែន (Rock Wool) ព្រមទាំងមានប្រហោងខ្យល់ កង្ហារ និងម៉ាស៊ីនត្រជាក់ ទៅតាមតម្រូវការរបស់អតិថិជននោះ លោក វុទ្ធី អាចបង្កើតលំនៅឋានមួយដែលអាចរស់នៅបានយ៉ាងងាយស្រួល និងមានតម្លៃសមស្របទៀតផង។
លោក វុទ្ធី ថ្លែងថា ទូកុងតឺន័រអាចយកទៅប្រឡូកចូលក្នុងទីផ្សារកម្ពុជាបាន ពិសេសគឺក្នុងទីក្រុងភ្នំពេញ តែម្តង។
លោក វុទ្ធី ថ្លែងថា ៖ «វាមានតម្លៃសមរម្យ មិនខ្ទរសំឡេង និងធន់នឹងកម្តៅទៀតផង។ វាមិនស៊ីទំហំដីហើយងាយស្រួលរកទិញបានគ្រប់ពេល»។
លោកបន្តថា ៖ «ដោយអាចយកកុងតឺន័រមកច្នៃប្រឌិត និងប្រើសម្រាប់គម្រោងផ្សេងៗបាន នោះ យើងអាចជួយសម្រេចគោលដៅអតិថិជនបានយ៉ាងច្រើន»៕
Get in touch with Vuthy today: 089 / 098 / 068 822977
Comments