ខេត្តកំពង់ស្ពឺនាពេលបច្ចុប្បន្នកំពុងចាត់ផ្តើមប្រែមុខប្រែមាត់តាមរយៈគម្រោងអភិវឌ្ឍន៍ធំៗជាច្រើនបាននឹងកំពុងបន្តហូរចូលទៅអភិវឌ្ឍន៍ក្នុងខេត្តក្នុងមួយនេះមានទាំងតំបន់សេដ្ឋកិច្ចពិសេស តំបន់ឧស្សាហកម្ម និងទេសចរណ៍ និងអគារឧស្សាហកម្មទំនើប ។
ជាក់ស្តែងកាលពីពេលថ្មីៗនេះ គម្រោងមជ្ឈមណ្ឌលកសិកម្ម កម្ពុជា-សិង្ហបុរី ដែលទើបតែបានប្រកាសបើកសម្ពោធនិងត្រូវធ្វើឡើងលើផ្ទៃដីទំហំប្រមាណ១០០០០ហិកតា នៅស្រុកឪរ៉ាល់ ខេត្តកំពង់ស្ពឺ បន្ទាប់ពីក្រុមហ៊ុន HLH Group បានចុះកិច្ចព្រមព្រៀងអនុសារណៈយោគយល់ (MoU) ជាមួយសហព័ន្ធផលិតកម្មសិង្ហបុរី ក្នុងន័យដើម្បីនាំយកវិនិយោគិនបន្ថែមមកកាន់ប្រទេសកម្ពុជា ។
.jpg)
តាមរយៈការចុះកិច្ចព្រមព្រៀងអនុសារណៈយោគយល់ (MoU) នេះនឹងធ្វើឱ្យ HLH Group អាចចូលជាបណ្តាញសមាជិកសាជីវកម្មប្រមាណ៥០០០ក្រុមហ៊ុន និងដើម្បីប្រមូលផ្តុំការវិនិយោគចម្រុះលើវិស័យកសិកម្មដូចជា ការកែច្នៃចំណីអាហារ ចិញ្ចឹមសត្វ ទីកន្លែងពាណិជ្ជកម្ម និងចម្ការថាមពលព្រះអាទិត្យជាដើម ។
គម្រោងមជ្ឈមណ្ឌលកសិកម្មកម្ពុជា-សិង្ហបុរី នេះបែងចែកជា១៦តំបន់រួមមាន ៖ តំបន់ពាណិជ្ជកម្ម, ដីកម្មសិទ្ធិឯកជន, តំបន់ស្នាក់នៅ និងលំនៅដ្ឋានសាធារណៈ, គម្រោងអភិវឌ្ឍន៍ចម្រុះ, តំបន់ដំណាំកសិកម្ម, តំបន់កសិកម្មចិញ្ចឹមសត្វ, តំបន់ឧស្សាហកម្មធន់ស្រាល, តំបន់ឧស្សាហកម្មកែច្នៃអាហារ និងមជ្ឈមណ្ឌលដឹកជញ្ជូន, តំបន់កសិកម្មចិញ្ចឹមត្រី សត្វ និងថាមពលដើរដោយពន្លឺព្រះអាទិត្យ, តំបន់ជីកយករ៉ែថ្ម, តំបន់លក់សម្ភារៈសំណង់, រោងចក្រផ្គត់ផ្គង់ទឹក និងស្តុកទឹក, អាងស្តុកទឹកសម្រាប់ប្រព័ន្ធធារាសាស្ត្រ, កសិកម្មលម្អត្រី កង្កែប និងបង្កង និងតំបន់សម្រាប់អាជីវកម្មលើរូបបដិមា ។
សូមបញ្ជាក់ផងដែរថា គម្រោងនេះនៅជិតផ្លូវជាតិលេខ ៣, ៤, ៤១, ៤៤ និង ៥១ ដែលមជ្ឍមណ្ឌលផ្តល់នូវមធ្យោបាយងាយស្រួលក្នុងការធ្វើដំណើរសម្រាប់អាជីវកម្មដែលមានតម្រូវការដឹកជញ្ជូនតូចធំ និងផ្តល់ភាពងាយស្រួលសម្រាប់អាជីវកម្មនៅទីក្រុងជុំវិញទៅមជ្ឍមណ្ឌលក្នុងគោលបំណងធ្វើជំនួញជួញដូរគ្រប់ប្រភេទ ៕
Comments