បច្ចុប្បន្នបើនិយាយពីការរីកចម្រើននៃគម្រោងបុរី និងផ្ទះល្វែងគឺគ្មានបណ្ដាខេត្ដណាដែលមានគម្រោងអភិវឌ្ឍន៍បុរីច្រើនជាងទីក្រុងភ្នំពេញឡើយ គ្រាដែលរាជធានីមួយនេះជាបណ្ដុំនៃការងារ និងកំពុងមានតម្រូវការលំនៅឋានច្រើននាពេលបច្ចុប្បន្ន ។ ការរីកចម្រើននៃគម្រោងផ្ទះបុរី ផ្ទះល្វែង ខុនដូ អគារពាណិជ្ជកម្មធំៗ រោងចក្រ សហគ្រាស -ល- ជាច្រើនដែលជាកត្តាមួយធ្វើឱ្យមានតម្រូវការដីកាន់តែច្រើនឡើងដើម្បីបំពេញតម្រូវរបស់អ្នកវិនិយោគនានា ។
ស្ថិតក្នុងសភាពមេរោគកូវីដ១៩នៅមិនទាន់បាត់ទាំងស្រុងអាចធ្វើឱ្យទីផ្សារអចលនទ្រព្យមានការប្រែប្រួលធ្លាក់តម្លៃទាបបានជាងពេលធម្មតា ប៉ុន្តែក៏មានតំបន់ខ្លះនៅតែអាចរក្សាតម្លៃបានដដែលដូចជាតំបន់កណ្តាលក្រុងជាដើម ។ ប៉ុន្តែទន្ទឹមនឹងនោះប្រសិនបើមានលុយចង់វិនិយោគលើអចលនទ្រព្យ តើគួរតែជ្រើសរើសតំបន់ណាដែលអាចទទួលបានចំណេញច្រើន?
ការជ្រើសទិញដីនៅតាមបណ្ដាតំបន់ជាយក្រុងក៏ជាជម្រើសល្អក្នុងអំឡុងពេលកូវីដ១៩មិនទាន់សាបសូន្យនេះ ប្រសិនជាមានឱកាសវាក៏ប្រសើរជាងការទិញដីនៅតាមបណ្ដាខេត្ដដែលមិនសូវមានភាពចំណេញ និងអាចនឹងកប់ ហើយទីផ្សារវិញមិនថា ស្ថិតក្នុងតំណាក់កាលណានោះទេគឺដីនៅតំបន់ជាយក្រុងអាចនៅតែលក់បានមានអ្នកទិញ ។
ជាក់ស្តែង តម្លៃដីឋិតនៅតាមបណ្តោយមហាវិថីសម្តេចតេជោ ហ៊ុន សែន ឬផ្លូវ៦០ម៉ែត្រ បានកើនឡើងយ៉ាងគំហុកក្នុងរយៈពេលជិត៨ឆ្នាំចុងក្រោយ ដោយកើនឡើងដល់ទៅ១១ដងក្នុងរយៈពេលពីឆ្នាំ២០១៣មកដល់បច្ចុប្បន្ន ។ នេះបើតាមការសិក្សាពីក្រុមហ៊ុនអចលនទ្រព្យ ។
តាមរបាយការណ៍របស់ក្រុមហ៊ុន CBRE Cambodia ទាក់ទងនឹងអនាគតនៃទីផ្សារអចលនទ្រព្យភាគខាងត្បូងរាជធានីភ្នំពេញបានចេញផ្សាយថា ទីតាំងដីតាមបណ្តោយផ្លូវ៦០ម៉ែត្រដែលមានតម្លៃជាមធ្យម ២០០ ដុល្លារក្នុងមួយម៉ែត្រការ៉េកាលពីឆ្នាំ២០១៣ បានកើនដល់ជាមធ្យម ២២០០ ដុល្លារក្នុងមួយម៉ែត្រការ៉េនាពេលបច្ចុប្បន្ន ។ តម្លៃនេះបង្ហាញពីការកើនឡើង១១ដងក្នុងរយៈពេល៨ឆ្នាំចុងក្រោយនេះ ។
នៅតាមបណ្ដាខេត្ដមិនសូវជាអ៊ូអរ ហើយបើខេត្ដមួយមានឱកាសទីផ្សារខ្លាំង លុះត្រាតែខេត្ដនោះមានសក្ដានុពលអភិវឌ្ឈខ្លាំងដែរ ។ ចំណែកដីនៅក្នុងតំបន់ជាយក្រុងយ៉ាងណាក៏ដោយ ក៏មានភាពងាយស្រួលក្នុងការសាងសង់លំនៅដ្ឋាន ក្បែរទីក្រុងបានងាយស្រួល ហើយការចេញមកប្រកបការងារក៏មិនមានភាពលំបាកដែរ ។
ការលើកឡើងនេះមិនមែនមានន័យថា ដីនៅខេត្តមិនល្អទេ វាល្អគ្រាន់តែត្រូវចំណាយពេលយូរ និងទទួលបានផលចំណេញតិចជាងជាយក្រុង ។ តាមពិតដីធ្លីនៅតំបន់ណាក៏ល្អដែរ តែសម្រាប់តំបន់ដែលមានចរាចរណ៍ទិញលក់ច្រើន គឺនៅឆៀងខាងលិចក្រុងភ្នំពេញ ៕
Comments