ការទិញលក់ដីធ្លីតែងតែមានការផ្ទេរកម្មសិទ្ធិរវាងម្ចាស់ដើមទៅកាន់ម្ចាស់ដីថ្មី និងការបំពេញបែបបទឯកសារផ្សេងទៀតដើម្បីធ្វើឱ្យការទិញលក់នោះប្រកបដោយភាពស្របច្បាប់ ។ ប៉ុន្តែប្រសិនបើម្ចាស់ដីដើមត្រូវបានខាងធនាគាររឹបអូស ដោយសារម្ចាស់បំណុលគេចវេសពីការបង់ការប្រាក់ហើយបានរត់គេចមិនដឹងទៅដល់ទីណាទេ ។ តើម្ចាស់ថ្មីអាចស្នើរផ្ទេរកម្មសិទ្ធិបានដែរឬទេ?
លោក ង៉ែត ឆៃលាង អនុប្រធាននាយកដ្ឋានពន្ធចលនទ្រព្យ និងអចលនទ្រព្យ នៃអគ្គនាយកដា្ឋនពន្ធដារបានឱ្យដឹងក្នុងកម្មវិធីផ្សាយផ្ទាល់ស្តីពីពន្ធប្រថាប់ត្រាលើការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យថា ៖ «ខ្ញុំធ្លាប់បានជួបករណីរបៀបនេះច្រើនដែរ ឃើញជំពាក់បំណុលដាក់នៅធនាគារអីហ្នឹង ហើយមិនមែននៅសុខៗបានមកលើម្ចាស់បំណុលទេ គឺមានការកាត់ក្ដីដោយសាលក្រមតុលាការច្បាស់លាស់ណាស់ ចឹងហើយសម្រាប់ការបង់ពន្ធប្រថាប់ត្រាគឺរត់ទៅតាមអ្វីដែលជាការកាត់សេចក្ដីពីតុលាការថា តើកាត់ពីអ្នកជំពាក់បំណុលមកយើងហើយយកទៅធ្វើនិតិវិធីនៅខាងសុរិយោដី រដ្ឋបាលថ្នាក់ក្រោមជាតិអីក្ដី កសាងសំណុំឯកសារ ភ្ជាប់ជាមួយដីកាតុលាការមកខាងអគ្គនាយកដ្ឋានពន្ធដារ យើងអាចបង់ពន្ធប្រថាប់ត្រាលើការផ្ទេរសិទ្ធបានហើយ» ។
លោក ង៉ែត ឆៃលាង បានបន្ដថា ៖«ចឹងមិនមែននៅសុខៗបានមកហើយ យើងយកទៅបង់ពន្ធតែម្តងបានទេ យើងអត់មានមូលដ្ឋានអីទេ ទាល់តែធ្វើបែបបទដូចការទិញលក់ចឹងដែរ រួមជាមួយដីការតុលាការអីអមគ្នា» ។
ជារួមប្រសិនបើចង់ធ្វើការផ្ទេរកម្មសិទ្ធិលើការទិញលក់ដីធ្លីនោះបាន លុះត្រាតែខាងធនាគារ និងម្ចាស់បំណុលដែលជាម្ចាស់ដីដើមមានការដោះស្រាយគ្នាចប់រួចរាល់សិន ទើបម្ចាស់ដីថ្មីអាចមានសិទ្ធិធ្វើពន្ធប្រថាប់ត្រាដើម្បីផ្ទេរកម្មសិទ្ធដីធ្លីនោះបាន ៕
Comments