ការបិទការលក់គឺជាគោលដៅសំខាន់បំផុតសម្រាប់បុគ្គលិក ឬភ្នាក់ងារលក់អចលនទ្រព្យ ហើយប្រសិនបើអ្នកពូកែអត់ទ្រាំ និងមានយុទ្ធសាស្ត្រល្អក្នុងការបិទការលក់នោះអ្នកនឹងទទួលបានជោគជ័យ ។ ប៉ុន្តែការបិទ ការលក់អចលនទ្រព្យមិនមែនជារឿងងាយស្រួលនោះទេ ព្រោះវាមានតម្លៃថ្លៃ ដូច្នេះវាទាមទារឱ្យបុគ្គលិក ឬភ្នាក់ងារលក់ត្រូវមានបច្ចេកទេសបិទការលក់ និងត្រៀមខ្លួនជានិច្ចក្នុងការដោះស្រាយបញ្ហាដែលនឹងត្រូវប្រឈមនៅពេលអតិថិជនឆ្លើយតប ។
ប្រសិនបើអតិថិជនរបស់លោកអ្នកនិយាយថា សុំគិតមើលសិន? តើអ្នកនឹងបិទការលក់នោះដោយរបៀបណា? ថ្ងៃនេះ Realestate.com.kh នឹងនាំយកបច្ចេកទេសបិទការលក់ដែលពេញនិយមទាំង៤ជាជំនួយសម្រាប់លោកអ្នកក្នុងការបិទការលក់ឱ្យបានជោគជ័យ ៖
ទី១- បិទឱ្យចំចំណុចក្តៅ
អ្វីទៅជាការ «បិទឱ្យចំចំណុចក្តៅ» របស់អតិថិជន? ការបិទឱ្យចំចំណុចក្តៅ ជាការលើកយកចំណុចពិសេសរបស់គម្រោងអចលនទ្រព្យដែលលោកអ្នកកំពុងលក់ឱ្យចំចំណុចក្តៅដែលអតិថិជនត្រូវការបំផុត ។ ហើយក្នុងនាមលោកអ្នក ជាអ្នកលក់ម្នាក់ត្រូវតែស្វែងរកចំណុចក្តៅរបស់អតិថិជនឱ្យបាន ហើយត្រូវចុចចំណុចនោះម្តងហើយម្តងទៀត ដើម្បីបង្កើនចំណង់របស់អតិថិជនឱ្យកាន់តែពុះកញ្ជ្រោលខ្លាំង ។
ទី២- បិទមុំស្រួច
បិទមុំស្រួច គឺជាបច្ចេកទេសប្រើនៅពេលអតិថិជនចង់ប្រើគម្រោង តែបែរជាស្វែងរកហេតុផលផ្សេងដែលគាត់មិនអាចទិញបាន ។ ការស្វែងរកហេតុផលពិតប្រាកដនៃការបដិសេធ គឺជាចំណុចសំខាន់ក្នុងការលក់ ។ នៅពេលដែលអតិថិជនរបស់លោកអ្នកលើកហេតុផលមកថា «ខ្ញុំចង់បានការបង់ប្រចាំខែដែលទាបបំផុត ឬខ្ញុំមិនទាន់មានលុយ -ល-» ។
ប្រសិនបើលោកអ្នកចង់ដឹងថា ការបដិសេធរបស់អតិថិជនតាមរយៈការផ្តល់ចម្លើយដូចខាងលើ លោកអ្នកអាចសាកល្បងសួរថា «ប្រសិនបើមានការបង់ប្រចាំខែទាប ឬប្រសិនបើបងមានលុយគ្រប់គ្រាន់ -ល-» តើបងនឹងប្រើប្រាស់ ឬទិញគម្រោងនេះឬទេ? បើគាត់ឆ្លើយ «បាទ» ការបដិសេធនោះគឺពិតប្រាកដ តែបើគាត់ស្ទាក់ស្ទើរ ការបដិសេធនោះគឺមិនពិតប្រាកដ ឬគ្រាន់តែជាលេសប៉ុណ្ណោះ ។
ទី៣- បិទការសន្មត
បិទការសន្មត គឺជាបច្ចេកទេសដែលយើងអាចប្រើប្រាស់នៅពេលដែលអតិថិជននិយាយថា គាត់មិនមានលទ្ធភាព ។ នៅពេលដែលអតិថិជននិយាយដូច្នេះ យើងអាចឆ្លើយតបទៅកាន់គាត់វិញថា «បងកុំទាន់គិតពីរឿងលុយ សន្មតថាបងមានលុយគ្រាប់គ្រាន់ទៅចុះ !» ។ នៅពេលនោះអតិថិជនអាចនឹងស្រែកថា «ថ្លៃណាស់» ។ ត្រង់ចំណុចនេះវាមិនមែនជាការបដិសេដតម្លៃនោះទេ ប៉ុន្តែវាជាការសួរអំពីមូលហេតុនៃតម្លៃ ។
តម្លៃមិនសំខាន់ តែអ្វីដែលសំខាន់គឺមូលហេតុនៃតម្លៃ ។ លោកអ្នកត្រូវលើកហេតុផល និងគុណសម្បត្តិរបស់គម្រោងដែលជាហេតុនាំឱ្យតម្លៃកើនឡើង ឬថ្លៃ ។ នៅពេលដែលអតិថិជនបានយល់អំពីគុណតម្លៃ ពេលនោះតម្លៃនឹងលែងជាបញ្ហាទៀតហើយ ។
ទី៤- ការបិទលក់បន្ទាន់
ការបិទលក់បន្ទាន់ គឺជាបច្ចេកទេសដែលយើងប្រើដើម្បីបង្ខំឱ្យអតិថិជនប្រើ ឬទិញគម្រោងរបស់យើង ។ វាគឺជាបច្ចេកទេសបិទការលក់មួយដែលត្រូវឱ្យអតិថិជនសម្រេចចិត្តក្នុងរយៈពេលខ្លី ។ ឧទាហរណ៍ ៖ គម្រោងនេះជិតអស់ ឬជិតផុតការផ្តល់ជូនពិសេសហើយ (បើមានប្រូម៉ូសិន) ។ ការដាក់សម្ពាធកាន់តែខ្លាំង ឱកាសនៃការលក់អាចនឹងកើតមានឡើងកាន់តែខ្ពស់ ។ ទោះជាយ៉ាងណាបច្ចេកទេសមួយនេះមិនដូចបច្ចេកទេសបិទផ្សេងៗទៀតទេ លោកអ្នកគួរតែប្រើម្តងម្កាលចៀសវាងផ្តល់សម្ពាធខ្លាំងទៅកាន់អតិថិជន ៕
អត្ថបទដោយ
Comments